
كوشان بلدي
(((الحملة الشعبية الإلكترونية لتجريم تسريب أوبيع أرض فلسطينية لدولة معادية)))
باسم خالق الحب نبدأ
وباسم الزيتون اللي شايب عالحجر
باسم حبة القمح اللي طلعت من دمي
بكتب قصيدي... وبمضيها بكوشان عمري
أرضي مش كلمة في كتاب
أرضي شهادة ميلادي
نقشتها الشمس على جبين جدي
وختمتها غيمة المطر على تراب الوادي
كوشان بلدي مش ورقة في الدواوين
كوشان بلدي حجر من دار جدي
ريحانة على الشباك... وعود قمح بيد فلاح
وزيتونة عمرها ألفين عام
شاهدة إنو إحنا هون... من قبل التاريخ
---
قالوا بدنا نطمس الاسم
قلت: الاسم محفور في العروق
قالوا بدنا نمحي الهوية
قلت: الهوية رضعة من صدر أمي
قالوا بدنا نبيع الأرض
قلت: الأرض عرض... والعرض ما بينباع
التمسك بالأرض مش عناد
التمسك بالأرض صلاة
كل ما بسجد على ترابها
بحس إنو السماء ساجدة معي
--
يا أرضي يا وجع القلب الحنون
يا مفتاح الدار اللي معلق برقبتي
يا صوت المؤذن اللي طالع من مآذنك
يا ترنيمة الجرس اللي طالع من كنايسك
فيكي ريحة الخبز عالطابون
وفيكي دمعة أم على باب السجن
وفيكي ضحكة ولد راجع من المدرسة
حامل كتابه... وحامل وطنه بقلبه
---
ما ببيعك لو عرضوا عليّ الدنيا
ما بهاجر لو سكروا كل الدروب
جذوري ضاربة فيكِ لآخر النفس
وفروعي واصلة لآخر الغيم
أنا الفلاح اللي بذر اسمه بترابك
وأنا الشهيد اللي رواكي بدمه
وأنا الأسيرة اللي بتغني لاسمك من ورا القضبان
وأنا الطفل اللي أول كلمة نطقها: "فلسطين"
يا كوشان بلدي يا ورقة العز
مختومة بعرق الفلاحين
موقعة بدم الشهداء
مشهودة بزغاريد الأمهات
لو هدوا الدار... بنبنيها
لو قلعوا الشجر... بنزرعه
لو سرقوا الحجر... بنرجعه
لأنو إحنا أصحاب الأرض
وأصحاب الحق ما بضيع
رح أضل ماسك بترابك بإيدي
ورح أضل حافظ اسمك على لساني
ورح أورث كوشانك لولادي
كوشان مكتوب فيه:
"هذه الأرض فلسطين... ومن تمسك بها... تمسك بالحياة"
العودة حق... والأرض هوية... والهوية ما بتموت
بقلم الشاعرة مروة عوكل 🇵🇸✌️